30 فبراير الجناح التقني

خلاص مسحنا المدونات اللي لم تجدد من سبتمبر 2006.

تقدروا تشوفوا قائمة المدونات اللي في المجمع عن طريق http://omraneya.net/aggregator/opml

لما نلاقي وقت هنحاول نعمل قسم للمدونات الجديدة

أولا شوية احصائات عن مدونات المجمع

• عندنا 4 مدونات لم يتم تجديدهم من 2004
• 130 مدونة لم يتم تجديدها من 2005
• 200 مدونة لم يتم تجديدها من منتصف 2006
• 150 مدونة لم يتم تحديدها من أربع شهور
• 350 مدونة لم يتم تجديدها في 2007

من أصل 1431 مدونة

واضح تماما أن فيه مشكلة هنا، و خدوا في اعتباركم أننا مأجلين اضافة أعداد كبيرة من المدونات لقلة الامكانيات.

أظن مفيش جدل أن مطلوب نمسح المدونات الغير ناشطة (لو عندنا ليها أرشيف كبير ممكن نتيحه لكن متبقاش جزء من المجمع).

بس يا ترى ايه هو تعريف المدونة الغير ناشطة؟ يعني مفيش شك أن اللي مججدش من 2005 مش ناشط لكن 4 شهور؟ شهرين؟

أظن من خصائص مجتمع التدوين المصري أن فيه ناس كثير مقلة أو تدوينها متقطع و مع ذلك ليهم شعبية، و المجمع أداة كويسة لدعم ده و في رأيي ده ألطف بكثير من التدوين الاسهالي الذي يدون فيه المدون من باب الحفاظ على الرتم مش من باب أنه عنده حاجة عاوز يقولها.

يبقى عاوزين قاعدة كويسة تتعامل مع الرتم المصري اللطيف و في نفس الوقت تخف على المجمع شوية.

هاه ايه قولكم المدونة بتموت بعد كام شهر من انعدام التدوين؟

ثاني حاجة عندنا 4 مدونين خارقين بيدونوا في المستقبل (2008 من دلوقتي) دول في رأيي المفروض يتمسحوا تماما عشان مش ناقصة خيال علمي.

المناقشة اللي بدأت بعد طلب شريف نجيب حذف مدونته من المجمع طولت و أكيد كلكم زهقتم.

النتيجة النهائية للمناقشة هو أن مفيش حاجة أسمها حق المدون في حذف مدونته من المجمع.

لكن بما أن حتى اللي أقروا بانتفاء الحق اعتبروا أن الذوق يحتتم حذف المدونة أصدرنا الفرمان التالي

• سيتم حذف المدونات اذا طلب أصحابها
• منال و علاء بس اللي ليهم صلاحية حذف المدونات
• الحذف أساسا منعا للنفسنة و لصعوبة شرح انتفاء الحق للدهماء، لكن في حالة مطالبة مدونة نعتبرها مهمة بالحذف ممكن نختار نتجاهل الطلب
• هيتكتب في مكان ما (التذييلة، سياسة الموقع) نص بيوضح ان التدوينات المنشورة منشورة بدون الرجوع الى أصحابها

وتم حذف مدونة شريف نجيب من المجمع، و الخسارة خسارتنا أحنا طبعا.

يا ريت أسمع اراء ناس كثير المرة دي.

السؤال هو نعمل ايه لما مدون يطلب رفع مدونته من على المجمع؟

قبل كده كانت سياستي أني بما أني معتبر وجود تلقيمة ده رخصة ضمنية تسمحي باعادة نشر المحتوى طالما التزمت بتوضيح مصدر المحتوى و الربط اليه.

و حصل فعلا يجي خمس مرات أو أكثر أن ناس تطلب رفع مدونتها من على المجمع و رفضي كان دائما نتيجته خناقة معاهم (خناقة واحدة بس منهم اللي كانت علنية).

امبارح شريف نجيب طلب رفع مدونته و محتاجين ناخد قرار سياسة المجمع الجديد ايه في الموضوع ده.

منطق عدم الرفع

• في البدايات كان فيه ناس بتقول كلام رومانسي عبثي من نوع أن النت مفيهاش جنسيات و بالتالي عمل مجمع على بنية قومية عبث و أنا مش عاوز أتصنف مصري و كلام من ده، الكلام ده شكله حلو و منطقي و كان ممكن جدا نصف المدونين الأوائل ياخدوا نفس الموقف.
• يفترض الرافض ملكية المدون لتعبيره عن أفكاره، موقفي من الملكية الفكرية و حقوق النسخ راديكالي لا يعترف للمؤلف غير بالحق الأدبي، أخلاقيا مش مفروض يكون ليك أي تحكم على ما تنشره (ما لم تنشره موضوع ثاني طبعا).