30 فبراير الجناح التقني

يا ريت يا جماعة أكبر عدد يشارك برأيه في الموضوع ده

واحدة من آليات تزكية المحتوى هي أو زوار الموقع يعملوا تقييم للتدوينات، فيه أكثر من طريقة لعمل التقييم و أحب أسمع اقتراحاتكم

أكثر طريقة دارجة هي النجوم، يعني لكل تدوينة تقدر تديها تقييم من نجمة الي خمس نجوم، ميزة النظام ده أنه مفهوم للأغلبية، يعني مجرد وجود نجوم ينفع يضغط عليها الناس هتفهم ايه المطلوب منها.

عيبه أنه أولا مفيش وسيلة للتعبير عن التقييم السلبي، غير أني أتفادى التصويت، بس ده في الحالي دي ميفرقش ما بين تدونية معجبتنيش و تدوينة مشفتهاش. عيبه الثاني أنه مفيش وضوح في ايه الفرق ما بين نجمة أو نجمتين أو ثلاثة الخ، غالبية الناس هتستخدم خمس نجوم أو لا شيئ و مفيش اتفاق ما بين كل الزوار على معنى القيم المختلفة. أخيرا عيب النجوم أن ممكن تدي نتيجة معقوفة مثلا نفترض فيه تدوينة معجبتش 20 نفر فسابوها صفر و 5 اعتبروها نص نص فأدوها نجمة واحدة و خمسة كمان أصدقاء المدون اعتبروها تدوينة عبقرية أو جاملوا صديقهم و أدوها 5 يبقى كده تقييم التدوينة 30، تدوينة أخرى فيه سبعة اعتبروها نص نص و أدوها نجمة و اثنين ثانين اعتبروها أفضل شوية و أدوها نجمتين و واحد اعتبرها جديرة بثلاث نجوم و ثلاثة اعتبروها عبقرية و أدوها خمس نجوم المحصلة النهائيئة 29 يعني فيه تدونية عدد اللي أعجبوا بالتدوينة الثانية أكبر لكن بسبب تكتل المعجبين بالأولى حوالين خمسة الترتيب أظهر العكس.

الطريقة الثانية هي الطريقة المستخدمة على موقع http://digg.com و دي مبنية على أنك تقول التدونية عجبتني أو التدوينة معجبتنيش، مفيش تفرقة ما بين تدوينة عجبتني جدا و تدونية عجبتني عادي.

طريقة digg هي الأفضل من منظور التحليل الاحصائي لأن الكل هيستخدمها بنفس الطريقة و لأن فيها تقييم سلبي (و التقييم السلبي مفيد في خسف التدوينات المتسفزة مش بس التعبانة، يعني حل الأخ نكييف هو أن عدد كبير نسبيا من الناس يخسف بيه الأرض)، و طبعا نظام ديج بيخلي كل الأصوات متساوية في التأثير.

يعيب طريقة digg أنها غير معروفة، وجود سهم لفوق و سهم لتحت او علامة موجب و علامة سالب أو صباع أبهام لفوق و صباع ابهام لتحت وظيفته مش هتكون واضحة و هيحتاج شرح للناس عشان تستخدمه.

صوتي رايح ناحية digg قولولي رأيكم و لو فيه اقتراحات أخرى غير الأسلوبين دول.