التقرير المالي الأول
كده يا شباب يبقى بقالنا نصف شهر و شوية شغالين بالاعلانات و ده ميعاد التقرير المالي الأول
الحلقة السابقة
لما تقرر فصل المجمع قررنا تأجير سيرفر يتكلف 150$ في الشهر و تولي السيد بيسو مشكورا مهمة جمع تبرعات لتغطية تكلفة 3 أشهر على أساس أن دي فترة كافية لتحصل عائد الاعلانات.
بيسو جمع حوالي 400$ فعلا و دفعنا 150$ لشهر يناير و عدا نصفه أهوه.
المعلنين
الاعلانات على الوب أنواع، أبسط نوع و أريحه هو أنك تدي مساحة من صفحتك لشركة تقوم بدور وكالة اعلانات، الشركات دي ممكن تكون بتبيع المساحة بتاعتك لزباين بعينهم أو بتعرض اعلانات عشوائية أو بتعرض اعلانات مرتبطة بالمحتوى اللي عندك، بعد كده الحساب بيبقى بعدد الزيارات لكن الزيارات فقط بتعمل عائد بسيط جدا العائد الحقيقي بيجي لما حد من زوارك يضغط على الاعلانات.
أغلب وكالات الاعلانات السيبرية بتشترط أن الصفحة تكون انجليزية و كثر منهم مش بيحاسبك غير على الجمهور اللي بيجي من بلاد بعينها. (الولايات المتحدة مثلا).
في البداية اعتمدنا على اعلانات جووجل فقط لشهرتها الواسعة، جووجل بتحاول تظهر اعلانات مرتبطة بمحتوى صفحتك أو بالسياق الديموغرافي لزوارك، بسبب المحتوى و الجمهور العربي الاعلانات المطابقة للمحتوى قليلة جدا.
أسد تفضل مشكورا و شاورلنا على adbrite خدمة اعلانات بديلة لجووجل بتعمل خليط ما بين الاعلانات العشوائية و المرتبطة بالمحتوى و كمان بتتيح امكانية بيع مساحة لحملة اعلانية معينة لو فيه زبائن عاوزة.
الوضع الحالي أننا بنستخدم اعلانات جووجل و لو جووجل فشلت تلاقي اعلانات مناسبة بنحول على adbrite
الزمن و التكاليف الادارية
جووجل ممكن تبعت شيك كل شهر على الأكثر بشرط أن قيمة الشيك متقلش عن 100$ تكلفة ارسال الشيك بخدمة بريد دولي سريع مضمونة حوالي 25$ و الشيك هياخد أربع أيام بالكثير قوي عشان يوصل، بعد كده هتواجهني رحلة صرف الشيك، حسابهم لحسن الحظ على بنك ستي لكن الشيط لا يمكن يصرف نقدا لازم يتحط في حساب و طبعا ده في عرف البنوك المصرية له تكاليفه و مصاريفه و بياخد وقت غير محدد.
عمليا ملوش معنى ارسال شيك بأقل من 200$ عشان نقلل من المصاريف (التكلفة على كل شيك يبقى لو قللنا عدد الشيكات قلت التكلفة) و ده ممكن يكون معناه الانتظار لأكثر من شهر.
adbrite بقى ألطف و ألطف، أولا لازم يمر على العائد شهرين قبل ما يكتبوا شيك، الحد الأدني 25$ و مفيش مصاريف للبريد لكن الشيك بيتبعت ببريد عادي يعني ممكن ياخد شهر أو شهرين على ما يوصل و ممكن ميوصلش خالص (يا فرحتي)، و الألطف كمان أني معنديش أي فكرة ايه البنك اللي بيستخدموه و له فروع في مصر ولا لأ.
الربح
التعاقد مع المعلنين لسبب ما غامض بيمنع نشر احصائيات كاملة، لو حد مهتم بالتفاصيل لازم يبعت يسألني بالبريد.
متوسط عدد زوار المجمع في اليوم ضعف متوسط زوار المجمع القديم، ده غالبا بسبب أن السيرفر الجديد شغال تمام و مش بتواجهه المشاكل اللي كانت بتواجه المجمع القديم، امبارح مثلا جالنا حوالي 8000 زائر (مقدرش أبقى متأكد أبدا من أرقام الزوار المؤكد فقط هو أرقام الزيارات مش الزوار)، نصفهم على الأقل وصلنا عن طريق بحث على محركات البحث (و كل اللي بيضغطوا على الاعلانات تقريبا من بتوع البحث دول).
متوسط الربح من جووجل 2$ في اليوم و من adbrite 5$ في اليوم.
معدل الربح ده في حد ذاته معناه اننا ممكن يادوبك نغطي نفسنا لكن مش متأكد أننا نقدر نوصل ل150$ في ايدينا قبل انتهاء شهر مارس بسبب الكلاكيع المشروحة فوق و متنسوش أننا لسه منعرفش جملة المصاريف ايه.
النتيجة النهائية؟
لو استمر الوضع بالشكل ده يبقى الاعلانات مش هتحقق الهدف اللي كان مرجوا منها و هو اننا منقلقش على الموارد و الماديات خالص، في نفس الوقت الوضع مش منهار تماما، لو اخترنا التفائل فيما يخص أداء البوسطة و البنوك المصرية يبقى الوضع على الحركرك لكن ممكن التعامل معاه.
حلول لتسهيل العملية
- سيرفر أرخص بامكانيات أقل (قد عين تدهور في اداء المجمع)
- سيرفر أرخص بعد تعديل المجمع بحيث يستهلك موارد أقل (مجهود تقني كبير، لو كده يبقى نستنى لحد الترقية لدروبال 5)
- اضافة معلن آخر، فيه فعلا كمان شركة قبلت بينا لكنها شركة بتحط اعلانات منحطة جدا جدا جدا بصوا على العينة الملحقة تحت، غالبا عائدهم هيكون أفضل لكن مش عارف اذا كان يستاهل المسخرة و قلة القيمة
- انتظار الفرج، نظريا عدد الزوار ممكن يزيد و المحتوى هيزيد و يمكن ده يؤددي لزيادة في دخل الاعلانات تعمل فرق.
| Attachment | Size |
|---|---|
| 7cb4c9d01647dbf866179c1bf73d5db6.gif | 36.12 KB |
| 51972fa90847eac8460ad1600a7649eb.gif | 24.69 KB |
| 499440439446af6ef688a4.jpg | 19.73 KB |
| 420688808434281ebcef7a.gif | 11.53 KB |
| 1996806805440363276b977.gif | 13.94 KB |
- Login to post comments
- 1142 reads
tags for التقرير المالي الأول
Syndicate
Comments
الكلام ده بعته
الكلام ده بعته اعلاء من فترة ، و هو قالي انشره هنا عشان نرغي فيه مع بعض ، أظن ده الوقت المناسب
مش عارف بس غير اعلانات جووجل ، ممكن تعمل اعلانات لدور نشر أو لجرايد أو لأحزاب مثلا؟ يعني تحجز جزء من الصفحة الرئيسية لصالح حاجه من دول تعرض فيها فلاش و لا ماعرفش بيسموه ايه عشان يسوقوا لأفكارهم ، الكلام ده هيكون عن طريق اتصال مباشر بينك و بين الجهة المعلنة ، ماعرفش برضه الكلام ده ممكن يتحقق ولا لأ ، بس أظنه هايكون أحسن بكتير من جووجل ، انا مستحيل ادوس على وصلة لجووجل ، بس ممكن أوي ادوس على وصله لدار الشروق مثلا
فكرة كمان للاعلان بس تقنيا مش عارف ممكن تنفيذها ولا لأ ، بما ان فيه مدونات مستضافه على المجمع انت ممكن تعمل لوجو ليك ، اللوجو الكبير مش الصغير ، تحط فيه وصلة للمجمع طبعا و وصلة للجهة اللي بتنشرلها - دار الشروق مثلا - أو الجهات اللي بتنشرلها ، اللوجو ده هاتشجع المدونات المستضافة عندك على اضافته فيها ، من باب المنفعة المتبادلة ظاهريا ، و من باب انك تقول للجهة المعلنة انك بتعملهم اعلان بشكل متشعب واقعيا
يعني الاعلان مش هايبقى منشور في موقعك بس ، لا دا هايبقى منشور في أي مدونة اختارت اتها تضيفه هي كمان ، طبعا مع الاقرار بأن ثمن الاعلان هارجع للمجمع مش لأي جهة تانية
فيه طريقة تانية منيلة حبتين ، زي ما بيقول المصريين من دقنه و افتله ، انت حاليا يا علاء شغال في الكمبوتر و الحاجات دي ، بتاخد فلوس أو مرتب على شغلك ، و بتقطع جزء منه عشان تنعش المجمع ، اتشطر كمان و روح اقنع جهة ثقافية أو مكتبة أو حتى سينما ، بانك تعملهم موقع ، و أظن الكلام ده هايبقى تقنيا سهل بالنسبة ليك ، من فلوس السايت ده تقدر تقوم المجمع ، و كمان تتمحلس عليهم و تقنعهم انك هاتعملهم اعلان في مجمعك يزود عدد زوارهم
كنت هاقولك نثال على دول ساقية الصاوي ، بس للأسف ساقية الصاوي عامله موقع ، مش عارف ممكن تقنعهم بعمل اعلان ليهم على المجمع و لا لأ؟
حاجه تانية الهيئات الأجنبية الثقافية ، عندك معهد جوته ، و المعهد الثقافي الايطالي ، و أكيد فيه كمان كذا حاجه غيرهم ، موجودين في مصر و مالهومش مواقع ، أظنك بكلمتين حلوين ممكن تطبق معاهم مبدأ من دقنه و افتله
طبعا لو الكلام ده اتحقق اجري و امسح ام الكلام اللي انا كاتبه ده ، لو حد منهم قرا الكلام ده هايسبولك الدين
فكرة كويسة،
فكرة كويسة، معنديش مانع إنى أحط إعلانات لصالح المجمع لكن هأختار المناسب لمدونتى، يعنى مؤسسة ثقافية زى ساقية الصاوى أو جريدة محترمة زى المصرى اليوم وحاجات من هذا القبيل.
فكرة
فكرة ممتازة
نعمل بصمة معينة عن طريق لوجو أو نص معين , ونحط تحتها نفس الإعلانات اللي علاء بيحطها في المجمع , يعني ناخد منه نفس الكود اللي هو حاطه ونحطه في مدوناتنا واللي نكسبه يروح لعلاء يصرف منه على المجمع ,
أنا شخصيا مستعد أحط إعلانات عندي لصالح المجمع ولو نجحنا نقنع عدد بتاع 100 مدون مثلاً يبقى قشطة للغاية . ونبيع ونكسب ونحط إعلانات عن المجمع في جوجل كمان .
http://asad.blogsome.com
موضوع أنط تحط
موضوع أنط تحط كود الاعلانات عندك ده سهل التنفيذ جدا.
بس أنا مش مستريح للفكرة، أصلي أصلا مبحبش الاعلانات و مش مستعد أحط اعلانات على مدونتي.
ولا أنا باحب
ولا أنا باحب الإعلانات , بس إذا كان ده الحل الوحيد لاستمرار المجمع بشكل فعال يبقى مفيش مانع , وهيبقى واضح إن الإعلان ده تطوعي لصالح المجمع مش لصالح صاحب المدونة .
وبعدين مش مهم إنت رأيك إيه , مش لازم تحط الإعلان في مدونتك , اعمل تصويت مثلاً وشوف الناس رأيها إيه .
http://asad.blogsome.com
في الحتة دي مش
في الحتة دي مش مهم رأيي خالص أصلا بما أن كل المطلوب مني هو اتاحة الكود و دي عملية سهلة.
مظنش أنه الحل الوحيد بس
الإعلانات
الإعلانات المرفقة زفت.
حتى لو مش مغطيين تكاليف المجمع من الإعلانات 100%، أعتقد أن الوضع الحالي جيد جدا. المجمع لسه ما اتبناش، و ما فيش مصايب حصلت، و ما طلعناش على digg مثلا، و لسة في مساحة لتطوير أداء الخادوم. أعتقد أن مزيج من آدبرايت و جوجلسكسونيا و التبرعات شغال جدا لغاية ما البلية تلعب، و نبيع و نكسب و نبيع و نكسب.
بالنسبة للتحويلات، إيه رأيكم أننا نوفر سيولة تغطي 4 شهور طوال الوقت كسياسة تمويلية؟ و نبقى نترعب و ننزل إبليس في الإشارات لما نبقى متغطيين شهرين بس؟
http://gharbeia.net
3 شهور
اتفق في الحفاظ على مصادر غير الاعلانات و 3 شهور مدة كافية لتفعيل اجراءات الطوارئ
وانت مش مختلفين كتير في النقاش الداير تحت
والاعلانات وحشة
رأيي أننا
رأيي أننا منحددش الوقت المطلوب تغطيته بالتبرعات بشكل جزافي. اللي يريحني هو أني أقيس الوقت المطلوب لوصول و صرف شيكات قدرها 200$ من كل وكالة و يبقى عندي رصيد أمان يغطي الفترة دي كلها أول اذا كنت متوقع انتظام في الأداء يغطي فترة وصول و صرف شيك واحد على الأقل.
عدا الاعلانات الشفتشي المرفقة ممكن كمان نعمل قلة تبرعات الكترونية تشتغل من مصر باستخدام moneybookers اللي هما مش ألطف و أبسط حاجة لكن يمكن يكونوا منتشرين نسبيا بما أن skype out بتستخدمهم.
عموما رموا أفكار محناش محتاجين ناخد قرارات لحد يوم 16 فبراير.
أنا قلت مثلا
200 دولار مش كفاية. خبرتي كواحد على باب الله إن أفيد إنك تغطي نفسك فترة أطول. ثلاث أو أربع مرات مصاريفك الشهرية علشان النور الأحمر ينور، و مرتين أو ثلاثة علشان الذعر يشتغل.
http://gharbeia.net
أنا بقول أغطي
أنا بقول أغطي نفسي بتحويشة تشيل الفترة المطلوبة لكسب و تلقي و صرف شيك ب200$ أتوقع أن ده يبقى معناه 3 شهور لجووجل و أربعة للحاج adbrite لكن بغض النظر عن توقعي اللي أقصده أننا نقيس فعلا هياخد وقت قد ايه و يبقى ده معيارنا للبراح.