30 فبراير الجناح التقني

أنا مقارنتش بجووجل بس، أنا قارنت بمحركات البحث عموما و محرك البحث بتاع المدونات بتاع جووجل، و تكنوراتي و بلوج لاينز و اكتفيت بدول لتصوري أنهم دول المعروفين لكن لو عايز من باب الدقة الأكادينية أرص 100 مثال أنا شايف تقاطع بينا و بينهم ممكن.

كده يبقى مفيش أي حيادية اه، ده وحش ليه؟

برضه بلاش تسقطوا أهداف غير معلنة، لا قلنا ديمقراطية ولا حيادية و لا عدالة و لا أي حاجة من دي، المجمع مش محايد المجمع منحاز لمدونات بعينها (فطاحل) و منحاز للصحافة الشعبية الخ.

و بعدين محدش قال مبدأ المجمع عدم الحذف، بالعكس قلنا مبدأ المجمع الحذف و الاستثناء هو عدم الحذف، مبدأ المجمع مش مبني على حق المجمع و حق المدون مبني على شراء الدماغ و الاستذواق.

أظن كلامي ملخبط شوية، أنا من الأول قلت فيه فرق بين هل للمدون حق علينا و هل من حقنا نتجاهل طلب المدون و بين ايه سياسة المجمع، أنا شايف أن من حقنا نخصص المجمع للشتيمة في الأديان و بس لكن دي مش سياسة المجمع.

ممكن نبطل نتناقش على الحق، أظن أني كتبت كلام كثير في ليه أنا شايف أن مفيش حاجة أسمها حقك في الحذف من المجمع و ردك يا مالك مفيهوش أي نقد حقيقي لكلامي (كلنا منعرفش حاجة عن ثلاث أربع القوانين التشريعية و قوانين الفيزياء و قواعد عمل التكنولوجيا اللي بتحكمنا و مع ذلك مفيش في أي سيقا بنعتبر فيه جهلنا حجة لتغيير القواعد دي أو تجاهلها أو تمشيتها بما يبدوا بديهي لمخنا الجاهل).

ملوش حق، خلصت و مش هتعرف تقنعني بعكس كده، اشترى دماغك و اتكلم في نعمل ايه بغض النظر عن له حق ولا لأ.

و ثاني يا ريت تفكر في المجمع كتجمع محتوى مش تجمع أفراد، ظهور تدويناتك في المجمع عامل زي ظهورها في جووجل و تكنوراتي و بلوجلاينز و تووت و أرشيف الانترنت و ألاف الخدمات و المواقع المشابهة.

بأكرر موضوع النقاش دلوقتي مهواش هل من حقنا نتجاهل طلب المدون بالرفع، أنا خلاص توصلت أنه اه من حقنا نتجاهل طلب المدون، السؤال دلوقتي هل برغم حقي الطبيعي في تجاهل طبل المدون هتجاهل طلب المدون و لا هنسمعه ولا حسب المدون ولا ايه.

معلش هعيد الكلام شوية في محاولة لتوضيحه أكثر

بصي يا دكتورة، الفكرة هي أني شايف أن المحتوى الرقمي و الانترنت و المدونات و ما شابه هي تقنيات مختلفة اختلاف جذري عن المجلة و بالتالي التعامل بمنطق أن زي ما في عالم الطباعة الصح كذا اذن في عالم الوب الصح كذا غلط.

لكن بما أننا مش أول موقع على الوب يبقى بدل ما أقيس نفسي على المجلات هقيس نفسي على مواقع الوب.

دلوقتي سادتك تقدري تعملي مجمع بنفس بساطة عمل المدونة على bloglines و تحطي عليه التلقيمات اللي على مزاجك و كمان تخلي المجمع بتاعك متاح لعامة البشر.

و تقدري تعملي ده من غير ما توفري ايميل أو أي وسيلة اتصال بيكي.

عمليا أي مدونة ممكن يكون فيه مئات المجمعات بتقرأ تلقيمتها و تعيد نشرها، من غير ما تستأذن المدون و من غير وجود آلية غير العشم لو توفر لرفع المدونة من على المجمعات دي، خدمة بلوج لاينز بتعمل فلوس عن طريق الاعلانات و هادفة للربح كمان يعني زيهم زينا.

يا ريتها وقفت على مجمعات، فيه محركات بحث في المدونات، فيه مواقع لمتابعة المدونات و محركات بحث عادية و غيرها، كل ده معتمد لدرجة ما على اعادة النشر (بعضها مش معتمد على التلقيمة أصلا).

كل ده معناه أن البنية بتاعت الوب النهاردة معتمدة على أن المحتوى المتاح ملكش حق تعترض على استخدامه في الخدمات اللي من النوع ده (و فيه أحكام قضائية في الموضوع ده)، أنا شايف المجمع واحدة من الخدمات دي و ينطبق عليه ما ينطبق عليها.

طيب لو فيه تقنية معمولة مخصوص عشان تمكن اعادة النشر و المتابعة مشغلها ليه لو مش عايز تسمح باعادة النشر و المتابعة؟

طيب لو أنا متضرر تماما أعمل ايه؟ بما أن أنت واحد و اللي بيستخدموا المحتوى بتاعك كثير يبقى المنطقي أن العبئ يكون عليك أنت في تنظيم مين له الحق يشوف المحتوى و يعمل بيه ايه، أبسط حل ألغي التلقيمة، لو أنت خنيق و عايز تسمح لكل حد عدا مجمع المدونات المصرية أنه يتابع تلقيمتك فيه حلول برضه بس ممكن متكونش سهلة، كونها مش سهلة ده مش مش سبب لأننا نقول لأ العبئ على مستهلك المحتوى، ما دام اخترت تنشر على وب يبقى يا تتعلم يا تستحمل (زي كده لو فيه ناس بتكتب تعليقات بايخة عندك، يا تتعلم ازاي تتحكم في التعليقات يا تستحمل، لكن مش منطقي تعدي عليهم واحد واحد تطلب منهم يبطلوا بحجة أنك مش عارف توقفها ازاي).

في نفس الوقت لو الحلول الصعبة مش عملية يبقى فيه احتياج لحلول أفضل، بس لحد ما تظهر الحلول الأفضل دي يبقى الحال كما هو عليه.

طيب حلول أفضل ازاي؟ مثلا في حالة محركات البحث و ما شابهها من البرامج بعد ما زاد عدد المتضررين من اضافتهم الى محركات البحث ظهر اقتراح بملف قياسي اسمه robots.txt الواحد بيحط فيه قواعد لمحركات البحث ترفق ايه و ما ترفقش ايه في قواعد بياناتها، الالتزام بالمعيار ده اختياري (عشم يعني) لكن العرف الأخلاقي بيشترط على الجميع الالتزام بيه و اللي ميلتزمش سمعته بتبقى وحشة.

المناقشة دي لو بتحصل مع كل مجمع في الدنيا و لو فيه ناس فعلا عاوزين يتيحوا تلقيماتهم لكل حاجة الا المجمعات بالذات و الناس دول كثير يبقى أكيد هيظهر حلول مشابهة.

حلو كده؟

يبقى ملخص الكلام ده، مفيش حاجة اسمها حقي في تحديد مين يستهلك تلقيمتي، لو عاوز تنظم ده دور على حل تقني، بعيدا عن الحقوق ممكن يظهر عرف سائد على الوب في الحالة دي هختار الالتزام بيه، لكن حاليا مفيش عرف سائد في الموضوع ده و محاولتي لاستنباط عرف بناء على علاقة الناس بالخدمات الأخرى بتؤكد انتفاء الحق.

في النهاية يمكن اعتبار الطلب من باب العشم مش من باب المطالبة بما يحق لك و في هذه الحالة يبقى قرارنا هو ايه الأهم أننا نبقى عند حسن ظن اللي اتعشم ولا أننا نكون أكثر شمولا من ناحية المحتوى.

المشكلة بالأساس مبدأ، الاعتبارات التقنية هنا بسيطة و منحصرة في ازاي مضيفش نفس المدونة ثاني بالغلط و أبسط حل ليها هو اني مقلقش و لما تبقى تضاف بالغلط أكيد صاحبها هينبهنا و مش أزمة. المسألة هي عايزين سياسة المجمع تكون ايه و زي ما قلت أكثر من مرة مش شايفها مسألة مرتبطة بحق المدون، قد ما هي مرتبطة بأحنا عاوزين علاقتنا بالناس تبقى عاملة ازاي.

طبعا لو اتعمل حاجة المجهود عند صاحب المدونة و بقيت معيار متعارف عليه (شبيهة بrobots.txt) يبقى هنلتزم بيها، مسألة اقتراحك بالذات ينفع ولا لأ مش هرد عليها لأني مليش مصلحة في اقتراح حل لمشكلة مش أنا اللي بواجهها، اللي متضرر يقترح حلول.

طيب اقتراحك ده مقبول و مهم حتى لو اتفقنا على حذف المدونات اللي تطلب.

و تبقى حاجة فيها أمانة أكثر من جملة المجمع مش مسئول عن الراء الواردة و تحط اشارة لطيفة لفلسفة المكان، أحنا فخورين بالاراء الواردة بما فيها الاراء اللي مش عاجبانا و لو فيه حاجة مهم نوضحها هي أننا مخدناش اذن صاحب الرأي و بس.

اثبات الملكية شكله هيبقى حاجة مهمة، المشكلة أنه مش موضوع سهل و غير متوقع يتنفذ قريب.

أنا مع الرأي دا و هاشوط شوطة أخيرة في مجال الحقوق لأن مهم توضيحه علشان ما حدش يبني مواقف أخلاقية على أساسات باطلة أو يحس بأنه ضحية زي ما اتقال في هذا النقاش:

أنا لست مع حذف المدونات من المجمعات بناء على طلب ناشر التلقيمة. لكني أفرق ما بين التجميع و إعادة النشر. التجميع بطبيعته يربط إلى المصدر الأصلي، و الربط على وب ليس خاضعا للاستئذان و ليس خاضعا لحقوق الملكية الفكرية. إعادة نشر المحتوى كمثل العلاقة بين الصحف و وكالات الأنباء شيء آخر.

موضوع الاستغلال التجاري و الوصم بعضوية مؤسسة ما ليس له معنى بالنسبة لي. مثل ما قال علاء لا تستطيع منع أي موقع و ليكن "موقع جيش الدفاع الإسرائيلي" من وضع رابط لمدونتك في صفحة المواقع المؤيدة للصهيونية".

أنا كمالك\مدير موقع يمكنني أن أعيد نشر ما أجمع من تلقيمات دون أن يكون هدفي إنشاء مجمع قومي أو حزبي. انا أفعل ذلك بشكل محدود بنشر عناوين/روابط تلقيمة أخبار البيئة في عامود جانبي في مدونتي، و محمد سمير ينشر في مدونته مجمعه الشخصي المعتمد على وب (مثل بداية مجمع منال و علاء).

كل الفكرة أنه بسبب أن ليست كل نظم إدارة المحتوى تسهل إنشاء مجمعات (دروبال يفعلها، لكن بلوجر لا) رسخ في عقل الناس رابط ما بين المجمعات و التنظيمات\الأحزاب\الشركات. مثل ما تكون في عقل الناس أن "المدونات" شيء مختلف عن "المواقع" أو "الصفحات الشخصية"

إعادة نشر التلقيمات تكون بالقدر الذي تتيحه التلقيمة: بعض التلقيمات تحوي المحتوى كاملا، و بعضها يحوي مقتطفات؛ و التحكم في يد ناشر التلقيمة. و هي شيء مشابه للاقتباس العلمي أو الأدبي و يتحدد بمحدداته و آدابه.

الأصل -في رأيي - هو أنه من حق أي موقع الربط إلى أي موقع، و ما دمت تنشر تلقيمة فمن حق أي موقع تجميعها.

حتى إن افترضنا وجود تقنية تحدد آليا لمستهلك التلقيمة إن كان من حقه إعادة نشرها على وب، فأنا يمكنني أتخيل شخص يسخر حياته لينشر يدويا (بالنسخ و اللصق) في موقعه اقتباسات من المواقع و يقول "في تاريخ كذا، الموقع الفلاني نشر كذا و كذا" و يرفق الاقتباس برابط. فكيف يكون الموقف الآن؟ التلقيم و التجميع تقنية ليس أكثر.

-- التعمية ما لهاش معنى إلا إن كنت عارف مسبقا كل شخص متلقي. و كذلك الوسومات ما لهاش معنى لأن ما أظنش حد هيحب يحمّل محتواه المنشور عبء وسم ليس له هدف إلا التعبير عن رفض الانتماء.

زي ال بيدفع فلوس علشان ما يبقاش عضو في نادي.

مفيش الحقيقة أي حلول تقنية سهلة معمولة للي عايز ويفر تلقيمة بس قافش على مجمع معين أو على المجمعات أجمعين.

تقنيا ممكن تمنع برامج أو أيبيهات بعينها من زيارة تلقيمتك أو موقعك كله، ده متاح في دروبال، أشك بشدة أنه يكون متاح ببساطة في wordpress بس غالبا في حاجة ما تركبها لوردبريس تعمل كده و أكيد مش متاح للناس اللي بتستخدم خدمات مجانية.

يعني خلينا نقول أن في اللحظة الحالية محدش تعامل مع مشاكل تنظيم عملية المجمعات، فلا فيه كود أخلاقي متعارف عليه ولا أدوات متطورة في الموضوع ده (بعكس مثلا التعامل مع الروبوتات).

كلام شريف كان غامض و أنا مطلبتش منه يوضح، هل بتقترح أن في كل مرة يطلب فيها الرفع نتصل بالمدون و نحاول نفهم أسباب الطلب و نحكم كل مرة على حدة؟

في الحالة دي يا ريت حد غيري يتطوع يقوم بالموضوع ده (و يتصل بشريف).