عن المشاهدين المحافظين
الاقتراح التالي جه في دماغي كنتيجه للخناقه اللي في جروب المدونين على جووجل و اللي اظن اغلبكم هنا عارفها
http://groups.google.com/group/bloggers-eg/browse_thread/thread/c5b99cf612eda232/ed94869c101f4f4e
اولا انا هنا باكتب من منطلق اناعايز المجمع اللي ازوره يبقى شكله ايه .. و الحقيقه انا باحترم جدا حق اي حد يدخل يشوف تدوينات على المجمع انه مايتصدمش بلغه او كتابات ممكن تكون مش مناسبه ليه .. و في نفس الوقت انا في المطلق مع نشر كل و اي شيء في المجمع .. طيب ايه الحل ؟؟
.. فكرتي بسيطه و اتقالت قبل كده .. متهيألي عمل شيء اشبه ب rating حايكون واقعي جدا .. فكرتي هي تكوين فريق من غير النشغلين بالجانب التقني البحت - انا متطوع - و يكون من اعضائها ناس محافظه و ناسس لأ .. يعني اتجاهات مختلفه و نبتدي نشتغل على وسم المدونات اللي بتحتوي في الغالب و ماسلوب مستمر على لغه حاده ( زي ابو الليل و ابليس و يحيى مجاهد و غيرهم ) او اللي بتهاجم مقدسات دينيه زي نكنييف و عبالكريم ربنا يفك سجنه مثلا .. و يتعمل زي لسان للتدوينات الخاليه من النوع الاول او الثاني او كليهما .. زي اللسان الخاص بالفطاحل دلوقت مثلا .. في اقتراح تاني بس محتاج جهد كبير حبه .. وهو عمل وسم للتدوينات اللي بتطلعها المجموعه دي باستمرار .. و نشر التدوينات - اللي يقال عليها نظيفه - مع باقي التدوينات في نفس اليوم و فصل الاخرى زي ماقلت في لسان تاني .. متهيالي الفكره افضل من الاعتماد على الزوار في التسجيل و تصنيف تدويناتهم او عمل flag او digg لان ببساطه نسبة المشاركه الفعليه للناس في المواقع اللي بتقدم خدمات ضعيفه جدا .. عامة دي افكار اوليه .. من غير معرفه تقنيه و لا تاكد من امكانية تحقيقها .. ممكن نتناقش بس في تصوراتكم عن حلول تانيه لحاجه زي كده او تطوير للفكره دي .. ياريت ناس من اللي بتتكلم في الجروب عن الموضوع ده تتحط هنا يا علاء عشان تعرف تشارك و تعلق
- Login to post comments
- 598 reads
tags for عن المشاهدين المحافظين
Syndicate
Comments
في رأيي أي حل
في رأيي أي حل لموضوع "نضافة" المحتوى لازم يكون مبني على مشاركة جمهور القراء مش على لجنة، غير كده تبقى وصاية أخلاقية.
عندي احساس دائم أن الشكوى من القباحة و مهاجمة الأديان مبالغ فيها بشدة بدليل ندرة محاولات عمل حلول عملية و عدم نجاح الحلول البديلة رغم دعم عدد مش بطال من المدونين ليها.
لو صحيح أن الموضوع أزمة كان بان من الزيارات (و التفسير بتاع ما هو الوساخة بتبيع تفسير عبثي، أولا لأنه احصائيا مش صحيح و ثانيا لأنه في حد ذاته يعبر عن أحط درجات الوصاية).
لو فيه مشكلة حقيقية يبقى أكيد جزء من الجمهور اللي مهواش مدونين مشاركين في حملة صليبية لتنظيف النت هيشارك في حلها، غير كده يبقى مفيش مشكلة أصلا.
دي حاجة، ثاني حاجة أنا رأيي برضه نبتعد عن الحلول اللي بتصنف المدونة كلها، المدونات اللي على طول الخط بتستخدم قباحة أو offensive (بترجموها ازاي دي) قليلة. بيسو و يحيى مجاهد و منال و علاء و عبد الكريم أمثلة لمدونات أحيانا ممكن تضايق و أحيانا لأ.
أخيرا لو هنعمل لجنة لازم يكون ليها معايير و لازم المعايير تكون محايدة (يعني لما تقول أديان يبقى كل الأديان تحت تعريف للأديان يتعامل مع واقع الكون مش أوهام بنو حام و سام).
انا متحمس للحلول اللي هتخلي ممكن يكون في صفحة مجمع (غالبا غير الرئيسية) آمنة للأطفال (بمعنى لو وريتها لشابة في ثانية اعدادي و أبوها عرف مش هيحصل مشكلة) لأن ده في تصوري هو المطلب الحقيقي اللي يستاهل نبذل فيه مجهود لو جمهور القراء طلع مش فارقة معاه.
1- طيب احنا
1- طيب احنا متفقين ان اي حل مبني على مشاركة الجمهور غالبا مش حايكون فعلا لان نسبة مشاركة الجمهور في تعديل او تزكية خدمات اي موقع ضعيفه جدا .. و بالتالي حانرجع لفكرة ان اللي بيسجل عندك و مهتم مثلا بقضيه زي دي هو اللي حايشتغل فعلا .. و دول ببساطه هم اللي متجمعين هنا في 30 فبراير .. الموضوع مابعتبروش وصايه اخلاقيه .. ممكن نعتبره شبه التمثيل النيابي .. و الناس اللي حايتم اختيارهم حايتفلتروا تلقائيا بدرجة نشاطهم .. مش بتوجهاتهم.. اعلان صغير عندك مثلا بدعوة ناس للمشاركه حايجيب ناس كتير .. يهمني جدا ان مجموعهزي دي يكون فيها حد زي ميت مثلا .. و في نفس الوقت حد زي نكنييف .. معايا ؟؟ طبعا انا قلت ان الموضوع صعب شويه .. لكنه اسهل بكتير في الحقيقه من انتظار معاونة الجماهير .. المشكله ممكن تكون في حجم الشغل و ده اللي حاوضحه في النقطه الجايه
2- انا اقترحت وسم مجموعه من المدونات لانها في الغالب حاتكون مصدر تدوينات زي دي .. الفكره انها تكون تحت ( moderation ) مثلا .. و ده مش فصل ليها عن باقي المدونات .. بالعكس انا شايف ان ال default في الصفحه الرئيسيه هو نشر كل حاجه و اي حاجه .. انا باتكلم عن اللسان اللي ممكن مشاهد عايز ( مدونات بلا بذائات ) يضغط عليه .. جميل ؟؟ الطريقه دي ليها ميزه مهمه وهي ان عدد المدونات اللي حانتابعها يكون قليل .. و التدوينات اللي كلها خارج المعايير اللي حاتتفق عليها اللجنه قبل الشغل . حايكون عددها قليل جدا جدا .. و ممكن نلقطها بسهوله بمراجعة الوسم بتاع المجموعه دي مرتين في اليوم مثلا .. او باستخدا م تنبيه بالبريد لو حد منهم بعتن بوست جديد .. ممكن تقسيم مهام بقى بحيث مثلا كل واحد يكون ماسك 10 مدونات
3- بالنسبه لنقطه ان الموضوع مش مشكله : فشخصيا انا ضد اي حاجه زي كده .. و مع ان المجمع ينشر كل و اي حاجه في المطلق .. ولولا المناقشه اللي في الجروب ماكنتش فتحت الموضوع .. كانت في محاولات سابقه لعمل مجمعات موازيه خاليه من بذائات .. و كان في محاولات لحملات طبعا .. و دي كلها حاجات تدل على ان في مشكله برضك .. انا باثير الموضوع هنا لان بغض النظر عن عمر الي بيقرا .. انا باحترم جدا حق صديقي المحافظ مثلا انه مايشفش ع المجمع لفظ حاد او وصف لفعل جنسي .. او حتى شتيمه في ربه او رسوله او مقدساته .. مع ان ده مش مشكله بالنسبالي بتاتا .. بس ده حقه طبعا .. نفس منطقك بالظبط لما بتتكلم عن الشرايح العمريه .. انا هدفي هو عمل اكتر من الاختيار للناس اللي بتتصفح المدونات .. مش انها تبطل تدخل لمجرد ان احتمال يبقى في حاجه مش عايزين يقروها
4- بالنسبه لمعايير اللجنه فده هو الموضوع المهم الحقيقه .. اللجنه لازم تكون من اطياف مختلفه .. ولازم توافق بالاجماع قبل تمرير اي قرار .. لانها بتمثل اطياف اللي بيقروا .. عشان كده طلبت نعمل اعلان صغير في الجروب مثلال .. ان اصحاب وجهات النظر المتصارعه ينضموا لينا هنا و نبتدي نتكلم عن المعايير للمدونات اللي عايزينها في الصفحه الرئيسيه .. حايبقى نوع من الحجر حقيقي لكنه لازم مؤقتا .. و يمكن تغييره في وقت لاحق .. بصفحةويكي او منتدى نقاش لاي حد عايز يزود او ينقص في المعايير دي .. بس نكون ابتدينا شغل على القديمه عشان مانضيعش وقت
5- مطلبك بخصوص صفحه غير الرئيسيه تكون مناسبه للاطفال و الناس الUnder age هي بالظبط فكرتي اللي يهاتي فيها من الصبح .. الاضفاضه الوحيده هي صفحه للناس المحافظه .. و مكن جدا يبقوا صفحتين متفلترين .. برضه الافكار دي بدائيه و ممكن سخيفه و حاتكبر بالحوار حواليها
شوف يا سيدي،
شوف يا سيدي، فيه دراسات عديدة اتعملت على مجتمعات النت الناجحة من أول المنتديات الصغيرة لحد ويكيبيديا و المشاهدة المتكررة هي أن مطلوب نسبة مشاركة صغيرة عشان المكان يبقى مفيد و عبر عن أغلبية الزوار لكن لو متحققتش النسبة دي بيبقى فيه مشكلة.
النسب كانت متفاوتة بدرجات بسيطة لكن من باب التسهيل النصيحة هي أنك تحط لنفسك هدف 1% من زوارك مسجلين و بيستخدموا أغلب امكانيات الموقع و 10% من زوارك مسجلين و بيستخدموا بعض امكانيات الموقع بانتظام.
لو بصيت على صفحة ويكي آليات تزكية المحتوى هتلاقي أنها معتمدة بشدة على تحقق النسبة الذهبية دي.
طيب ده معناه أننا بنبي الموقع كله على أمل تحقيق النسبة الذهبية و معناه أننا هنبذل مجهود في ضمان ده، ليه بقى استثني خاصية بعينها في الموقع من الافتراض ده؟
هنبني الموقع على مبدأ مشاركة الجمهور و بعدين نشوف النتيجة ازاي لو فشلت الموقع كله لازم يعاد تصميمه أخذا في الاعتبار أنه مينفعش نعتمد على مشاركة الجمهور و وقتها نبقى نشوف نحل كل مشكلة ازاي.
انسى موضوع اللجنة الأخلاقية تماما، الطريقة الوحيدة اللي هيتعمل بيها لجنة أخلاقية هي أنها تبني نهفسها بنفسها حوالين آداة زي الوسم، و لو المطلوب متابعة مدونات بعينها فدي مسألة سهلة لأن كل مدونة ليها صفحة على المجمع ممكن يتعمل المتابعة منها. عدا هذا أي لجنة هتشكل تشكيلها هيكون بمزاج منال و علاء (زي اللجنة دي كده اللي على فكرة فيه أكثر من حد قدموا يشتركوا فيها و رفضنا).
لو اللجنة الأخلاقية دي ظهرت عضويا و عجبت منال و علاء أو كان ليها شعبية وسط القراء (مش شعبية وسط المدونين) و كان عندهم مطالب لتعديل النظام بحيث يسهل شغلهم أكثر هنسمع كلامهم، لو اللجنة دي آليات عملها كانت مشابهة لآليات عمل لجان أخرى مهياش أخلاقية و كانت ليهم مطالب مشتركة لتعديل النظام يبقى برضه أهلا و سهلا بغض الظر عن شعبية اللجنة و وجاهتها.
لو الموضوع كله طلع بلوظة و محدش اهتم لا يعمل لجان ولا يوسم يبقى أصلا مش هينفع نعمل مجمع فيه كل المدونات.
كلام جميل كلام
كلام جميل كلام معقول .. عايز اعرف ايه تصوراتك لحلول تانيه في حالة المشكله ظهرت و بقت ملحه ؟؟ ايه حلولك لحاجه زي اللي انت قلت عنها بخصوص المحتوى المناسب للاطفال ؟؟
مفيش تصورات
مفيش تصورات لحلول لمشاكل مش موجودة حاليا، لما تحصل نبقى نحلها، المطروح دلوقتي هو آليات لوسم و تزكية المحتوى يمكن استخدامها من قبل المحافظين لو عايزين، يمكن ده يكون كافي لتفادي أي مشاكل مرتبطة بالمحتوى الكخة و يمكن لأ أدينا بنجرب و نكتش و نتعلم.