أهدافنا
هنا هنحاول نجاوب على ليه مهم نحافظ على وجود المجمع و نصرف عليه فلوس و مجهود و وقت، و لو هنطور و نغير ايه الأهداف اللي عايزين نحققها.
دي مش محاولة لكتابة نص يوصف المجمع دي محاولة لفهم المجموعة اللي بتتناقش دي مهتمة بالموضوع ليه و شايفة ايه، أقترح نبدأ بأن كل واحد يكتب هو بيستخدم المجمع ليه (اذا كان بيستخدمه) و بيرشحه لقراء ليه اذا كان بيرشح و بيرشحه لمدونين يضيفوا نفسهم ليه اذا كان بيرشح برضه.
دي صفحة ويكي أعمل edit للصفحة و ضيف فيها كلامك مباشرة، خلوا التعليقات للأسئلة و التعقيب مش لاضافة أهداف. و لو عاجبك هدف كاتبه حد ثاني بس مش عاجباك الصياغة متتكسفش حرر و عدل في كلام زميلتك النظام هيفضل فاكر كل التعديلات و نقدر نرجع اللي راح لو فيه ضرورة.
الهدف من المجمع (ايه اللى يخلينى استخدم المجمع)
- مَعبر للقراء إلي المدونات المصرية , يساعدهم علي التعرف علي المحتوي الحديث للمدونات , و يفضل جدا أن يكون المحتوي مصنف أو به آلية للتفضيل و التزكية لتدوينات بعينها من قبل القراء أنفسهم .
- دعم المدونات المصرية المسجلة بجعلها مقروءة بشكل أكبر من قبل مستخدمي المجمع ,و مساعدة المدونات الجديدة في تقديم نفسها.
- مساعدة مجموعات مختلفة من المدونين على التشبيك بغرض التعاون و العمل المشترك (من أول مصر مش كده مرورا بمدونات بلا بذائات لحد كلنا ليلى دي كلها حاجات استفادت من وجود مجمع عشان تتعرف على بعض و توصل لجمهور أوسع)
- دعم الصحافة الشعبية بمكان مركزي يقدر الصحافيين و النشطاء و باقي الخلق اياها يتابعوه بسهولة .
- خلط صور و أنواع مختلفة من التدوين بيشجع الناس أنها تجرب حاجات جديد (ثقافة متخلفين من أجل التغيير انتشرت في أجواء المسيسين، المشاركة السياسية فكرة اتعلموها شباب كثير عن طريق المدونات و قاموا شاركوا في مراقبة الانتخابات مثلا لو مكانش فيه مجمع كان ممكن نسبة منهم تقرر أن السياسة مش موضوعها و لهاش فيه، أكيد فيه أمثلة عكسية ناس مهووسة بالسياسة و شافتلها حاجة مسلية أكثر و أفيد تعملها عن طريق المدونات، أنا شخصيا اتعرفت على كتب و مزيكا و أفلام جديدة عن طريق مدونات كان لا يمكن أفكر أتابعها بنفسي).
- المجمع بيظهر و أحيانا بيربي الميمات (ثيمة التحرش الجنسي مثلا كانت بتكبر و تنتشر على المدونات ببطء قبل أحداث وسط البلد)
- نظريا ممكن لأي حد يتابع عدد كبير من المدونات باستخدام برامج أو خدمات تجميع كثيرة زي الهم على القلب، أغلبية الناس معندهاش أي فكرة عن أي حاجة تقنية و مش ناوية يبقى عندها فكرة، المجمع المركزي بديل (و الحقيقة أنه مش بديل للجهلة و الكسالى و الغلابة فقط، مفيش برامج تجميع كويسة بجد حاليا و عملية اكتشاف المدونات شاقة المجمع بيوفر جهد حتى للمذاكرين).
- توفير تلقيمة أو تلقيمات عديدة تربط للتدوينات مباشرة--بدلا من المرور على صفحة المجمع في الوضع الحالي--يظهر أن مؤلفيها هم مؤلفي التدوينات و ليس علاء.
- تصفح التدوينات بالتصنيفات
- متابعة الاخبار/الانفرادات التى تقوم برصدها الصحافة الشعبية (وهنا مشكلة، هى محلولة فى المدونات المتخصصة فى الاخبار زى الوعى المصرى، لكن المشكلة فى المدونات الكوكتيل، ازاى نقدر نحط تدوينات الخبر فى مجمع منفصل عن تدوينات الرأى والحواديت والتحليل)
- متابعة جديد المدونات المفضلة لدي (امكانية قيام اعضاء المجمع بعمل صفحة "مفضلة")
- التعرف على المدونات المصرية الجديدة (من خلال قائمة بأحدث المدونات المنضمة حديثا للمجمع)
- تجميع التدوينات "ذات العلاقة الواحدة" يعنى مرتبطة بموضوع واحد، او مرصودة لدعم موضوع واحد
- التركيز على الاحداث و القضاية التى تقابل تهميش و تجاهل اعلامى مثل قضية المرءة واحترامها فى الشارع المصرى او حرية الاعتقادو التعبير بشكل يسمح بتوصيل وجهات النظر المطمورة للقارء العادى.
- عايز ااكد على تفرد كل مدون احنا مش قطيع مدونين احنا مجموعة لها اهتمام مشترك كتير هنختلف و دة طيبعى.
- الحفاظ على أرشيف للمدونات التي اختفت من على الوب
بص بقى فايدة اللعبة دي، لو مثلا مثلا مثلا يعني كلنا اتفقنا أن دعم الصحافة الشعبية هدف نبيل و معرفش ايه ممكن ناخد قرار بضرورة وجود صفحة بنلم فيها التدوينات اللي أحنا شايفين أنها مهم أن صحفيين و نشطاء و مظاهرجية و هتيفة و خبراء و صناع قرار و معرفش ايه يشوفوها بما أن الناس دي مش بالضرورة هتتابع كله، لكن لو طلع أن علاء بس اللي فارقة معاه دي يبقى ممكن نقرر أن لأ ملوش لازمة نعمل الموضوع ده.
ممكن تكتب اللى يجي على بالك دلوقتى، وكل ما تفتكر حاجة تعالى اكتبها، مش لازم تستنى كتير عشان تجمع كل الاهداف